اتذكرتكم واذكرت سنين من عمري المضة

أتذكرتكم

واذكرت سنتين من عمري المضة..

ناسيها عدكم..

أتذكرتكم...

والكَلب من نومته ...

فز ومشه يدور أثركم..

ياعِشرتي الماتصح عِشرة مثلكم...

يادمعتـــي الحايـــرة أدَور جفنكم...

ياورد بستان عمري ..

الماعرف بس فيْ عطركم..

ياجنــح فــراشة ينــزف..

مايموت ألا أعلة ضيكــم..

تذكريت....

وهاجن أجروحي الغفن بسكوت..

بس يبجن بُعدكم..

تذكريت....

وكــل عذاباتـي القديمة..

انمسحت وكتبـت اسمكم..

تصوريـت

اكَــدر أعانــد..

واكَدر آنسة اشكَد أحبكم!!

تصوريت

اكَـــدر اكابـــر..

وامسح الجلمات من كَلبي ألحملكم!!

شأكَدر آنسة!!

وبالكَلب شريان مـرسومة صوركم!!

شأكَدر آنسة!!

وأنيّ ليلية بحلم ياخذني يمكم!!

ياجــروحي الغافية بلذة آلمكم...

ياعمر ضيعته بيدي..

واعترف أنيّ أخسرتكم!!

ياقصيــدة انكتبـت بـدمع النـدم..

لمــن عفتكم!!

أنيّ غلطان اعترف..

من سمعت الواشي ذمكم!!

ثاري هاي الناس كلها تغار

من طيبة كَلبكم..

كـون نرجع مثل الاول!!

عيوني اطشنها بدربكم..

كون نرجع!!

وآلله أسوي الروح.. عطابة لجرحكم!!

****************
الشاعــر

جلال البطاط

كلمات رائعه ومعاني رائعه جدا تدخل القلب دون استأذان
سلمت الايادي يا برنسيسه على الشعر الجميل

عاشت الاايادي ككي على الشعر الجميل

شعر روعة وكلمات حلوة تسلم يدج

تحياتي

شكرا على المرور يا احلى اعضاء نورتووووني بزيارتكم الحلو