شامخ يا وطن تبقى انت فوك الراس ....

شامخ ياوطن تبقة انت فوك الراس
دمرت بشموخك فزعة الجورة
لئن عمرك بقيت بلا ونيس وياك
مثل الضوة تشع واخفو اثر نورة
صرت انت القلم يامبدأ الكلمات
وخلوك العجم يا حيف صبورة
ومشت اجيالهم تتخطة فوك الغيم
وهسة اجيالنة بالضيم مطمورة
وسط دهليز عايش يا وطن ضليت
لاعنوان الك لاوصف لاصورة
حرامات اليصير البيك هذا اليوم
عشت عمرك وسط اسوار معمورة
هجين التم عليك مشكل الاجناس
وابنك خالفك وانحدر من طورة
جرد لون الخضار الجان فوك الكاع
وفراتك ناشف ومكسور ناعورة
عجيبة اطفالك الجانت تفر الكون
بمراجيح الفرح لليوم مهجورة
شفت طفلة تباوع من ورة الشباك
ورة يومين شفت الجامة مكسورة
سألت اعلة الحصل يم باب هذا البيت
كالو امس يمهم عبوة مفجورة
عجيبة المن تسولف يا هو يشفي الآه
وحتة الآه من تصيح معذورة
بعد ما اشكي حالي ولا اسولف بيك
كل افكاري بيك اصبحت مغدورة
دعيش انت بسلام وعلم الاجيال
ومحي افكار حكامك المقبورة
لان تدري العراقي شكثر عاش بضيم
ضل مثل الاسير او مالعب دورة

منقوووووووووووووووول