مااحبك اتسلى جنت وياك

لاتضن كلبي نكسر عمره وياك
مامجروح اني وياك هذا الحد

واذا فرحان انته تقصدت وياي
ابشرك ماصبت سهمك عليك ارتد

لأن سهمك غشيم ومو سهم شجعان
ومو معدن شهامه البيه هو نحد

نكسر سهمك بصدري بنضرة استهزاء
لأن طباعي شهمه وبيه تتجسد

ماحبك ابد و اتسله جنت وياك
مثل ماي وعليه عطشان يتردد

انا الحب بقراري من الكلب مشيول
واكذب لو كلت حبيت يوم احد

وانا كليبي ميت من كبل ماجاك
من اول نبض بيه العشك اسود

مدفون الكلب وشيعوه من سنين
شالوه بنعش وحده عليه تشهد

انا كلبي خلاص انتهه الحب وياه
ونسه الي يحبهه وصار ماضي نسد

تجيني انته بمشيتك وطبعك الجذاب
تضن تهزني روح ارجوك يمعود؟

شتفيد الأحبك عكب الطعنات
مثل سكران ليل بصبحه يتعبد

ومثل ماي على جف سكران ويطيح
شيرده لجفوفه شلون يتوحد

اذا ماي وجمد بنهر طول سنين
تضن يتبخر انته بغيمه يتلبد

وصفه حالك عليه مثل افعى وياي
يبدل اللون بس وشكله يتجدد

انا النار على ايدي وماصحت احا
واكولن للحركني اجويني بعد ازود

وانا سيوف الزمن تكاونت وياي
وهم ردتلي تالي واني الأجود

انا زماني ذبحني وذرني دون الناس
صفيت بلاعشك وبهمي اتوسد

كبت حسراتي كلبي وابتسم للناس
اكابر ببسمتي بضحكي اتردد

صفن قهري على حالي من حملت الأه
وكلتله بقهرك انته زييد واتمدد

لأن بيه طبع شالنه بس الجبال
اضل ثابت مواقف وابد ما ارتد