منته بعيد .. انته العين واكرب من جفنهه انته
ومنته غريب .. انته الوالد اليحضن بديه وليده وبنته
ومنته وحيد .. انته الشعب كله بشيعته وسنته
منهو الكالك ناسيك ؟
هم ينسى الكمر وكته ؟
لو نبض الكلب يتنكر لدكته ؟
بس عشكك عشك مفضوح
وعشك الناس كلهه مساترة وسكته
صرت انته سبت وبركبة يهودي
هم شايف يهودي يجوز من سبته ؟
انته الفارس اليسبك هبوب الريح
وما ظن خيل سابكته
وانته ترابك اليرهم كحل للعين
ودوه للما شفت علته
ومن طينك نحني جفوف المعرسين
وكل اصبع فرح من فرحتك طكته
انته الريحة ترابك ترد الروح
هيل وزعفران وعنبر بشمته
ومثل تراب كاعك ما لكينه تراب
يرهم للصلاة من طينت تربته
انته ينام بيك (المرتضى الكرار)
التلوذ الناس كلهه بشارته وبخته
وانته ينام بيك بكربلاء (حسين)
المابايع الطاغي ودنك ركبته
وانته البيك ظلت شارة (العباس)
لمن طاح دنكله الفرات وباسه من شفته
من طلعت منك يوم طرني البين
كلبي وياي ما جبته
اثاريني نسيته هناك
عندك كلبي أمنته
شتلته بجرف دجلة الخير
وي سبحج الشواطي شربك اتبته
ومن امتدن عروكة بوسط ذيج الكاع
بماي الفرات ودجلة عممته
ولمن صار ينكل جدمه بين الناس
أخذته وياي للكاظم على الشباج زورته
كلمن طلع منك بقت حسره وياه
وظلت روسنه على الدار ملتفته
من غصبن علينه يا وطن عفناك
تبقى مضيفنه الماتنجفي دلته
صح هسه اصبحت من وطن نيدرلاند
هولندي الهوية وشعري جللته
وصح تأقلمت ويه الغرب فد نوب
وصرت ماصخ مثلهم والملح عفته
وصح كمت ارطن رطنهم لمن يرطنون
ولسان العرب بالأعجمي كسرته
لكن مدري شنهو يصير بيه من يمر طاريك
أحسنك دفو تموز وسط شته
وأثاريني مثل طبع النخل لو طال
يرجع للأصول وتنحني شعفته
عراق اللي جمعنه اليوم
كل الناس واصفته
العالم نسه يوم (11) من أيلول
صارت بيك سالفته
ناس تكول : لازم نحتويه ونشفط البترول
ونعوض الراح ونسرك بركته
وناس تكول : خطية اطفاله ماتوا من الجوع
وناس تكول : حيل وياه ما حمد ربه وشاكر نعمته
وانته بين هذا وذاك صاير شبح لليرمون
وياهو الكام ضدك سدد تفكته
جي لنك حلو والدول منه تغار
ماعدهم العندك من مجد نلته
انته اول وطن(آدم) وضع جدمه عليه وكال يا الله
ولنك وصلة من جنته
وانته اول وطن حبة النبي (ابراهيم)
ودعه ربه يصونه برحمته وعزته
وانته اول وطن مرسى لسفينة نوح
ونبي (أيوب) ناخت بيك راحلته
وانته اول وطن علم العالم أبجدية ويكتب التاريخ
وانته اول وطن قانون سننته
وانته اول وطن كالتله الشمس : يمه صباح الخير
ولو رادت تمسي تمسي يم كبته
وانته اول وطن ما تشبه الأوطان
مدري شلون ربك خالقك
سبحان ربي شلون صورته
صورته العراق وبس علينه يلوك
واحنه نلوكله لمن يحل وكته
وطنه وما نعوفه للأجى والراح
عراق الننتميله يا كبر بخته
ذوله اهل الغدر من عندك شيردون
ياهو الطاح منهم ما أجى وعنته
جان جيبك مو الك لمى العرب ينخوك
عزيز المال هيج وهيج طشرته
شو لمن طحت محد اجاك وكال عدعيناك
وانته جروحك ينزفن مثل دمع الشمع سكته
وبقيت وحيد مدمي بساحة الميدان واطفالك عليك بصفك ينوحون
وانته تون ولا مثله كبل مذبوح ون ونته
توجيت على جرحك كمت مهتميت
خاف الشامت يشوفك طريح ويشتفي بشمته
طبع بيك المكابر اكبر من الآه
واكبر من غدرهم يا بخت لفته
جم طاغي وطتراب بلادنا بس أنبياء الله ساحكتهاغي المر عليك وزال
وتكنسه السنين مكبع بذلته
تراب بلادنا يرفض اجدام الأجنبي والغازي والمحتل
تراب بلادنا بس أنبياء الله ساحكته